जिद्दीच्या बळावर स्वप्नपूर्ती : बोरी गावची आचल सहारे पोलीस दलात दाखल
प्रतिनिधी : अप्रव भैसारे
गडचिरोली जिल्ह्यातील कोरची तालुक्यातील अतिदुर्गम बोरी गावातील कु. आचल योगेश सहारे हिने आपल्या अथक परिश्रम, जिद्द आणि चिकाटीच्या जोरावर महाराष्ट्र पोलीस भरती प्रक्रियेत उल्लेखनीय यश संपादन करत कुटुंबासह संपूर्ण गावाचे नाव उज्ज्वल केले आहे.
साध्या शेतकरी कुटुंबात वाढलेल्या आचलसमोर अनेक आर्थिक व सामाजिक अडचणी होत्या. तरीही तिच्या वडिलांनी “मुलगी पोलीस व्हावी” हे स्वप्न मनाशी बाळगून परिस्थितीशी दोन हात करत तिच्या शिक्षणात कोणतीही कमतरता येऊ दिली नाही. आई अर्चना सहारे यांचा निःस्वार्थ पाठिंबा आणि भाऊ आर्यन सहारे याचे सातत्यपूर्ण प्रोत्साहन हे तिच्या यशामागील भक्कम आधारस्तंभ ठरले.
आचलने बोरी येथे प्राथमिक शिक्षण पूर्ण केल्यानंतर कुरखेडा येथील श्रीराम ज्युनिअर कॉलेजमध्ये पुढील शिक्षण घेतले. त्यानंतर मुक्त विद्यापीठातून कला शाखेत पदवी घेत असतानाच तिने स्पर्धा परीक्षांची तयारी सुरू ठेवली. गडचिरोली येथील लायब्ररीमध्ये अभ्यास करताना तिने शारीरिक तयारीवरही विशेष भर दिला—कारण तिला माहित होते की पोलीस भरतीसाठी मानसिक आणि शारीरिक दोन्ही कसोटी पार करावी लागते.
सन 2024 मध्ये अपयश आले, पण ती खचली नाही. उलट त्या अपयशाला धडा मानत तिने अधिक जोमाने प्रयत्न सुरू ठेवले. अखेर 2026 मध्ये तिने शारीरिक व लेखी दोन्ही परीक्षांमध्ये यश मिळवत आपले स्वप्न साकार केले.
आपल्या यशाबद्दल बोलताना आचल म्हणाली, “माझ्या आई-वडील, भाऊ आणि मार्गदर्शक रंजीत अप्पलवार सर यांच्या मार्गदर्शनामुळेच हे यश शक्य झाले. पुढे प्रामाणिकपणे सेवा देत समाजासाठी काहीतरी करण्याचे माझे ध्येय आहे.”
आचल सहारेची ही प्रेरणादायी यशोगाथा ग्रामीण भागातील अनेक मुलींसाठी आशेचा किरण ठरत आहे. कठोर परिश्रम, आत्मविश्वास आणि न थांबणारी जिद्द असेल, तर कोणतेही स्वप्न अशक्य नसते—हे तिने आपल्या कर्तृत्वातून सिद्ध करून दाखवले आहे.
शेवटी आचलचे शब्द प्रेरणा देणारे ठरतात—“मनात ठरवलं की सर्व काही शक्य आहे!”
