बोगस शालार्थ आयडी घोटाळा उघड; जळगावातील ४८ अधिकाऱ्यांना SIT ची नोटीस
प्रतिनिधी | प्रणित काठोके
राज्यातील शिक्षण विभागात मोठी खळबळ उडवणारा बोगस शालार्थ आयडी घोटाळा समोर आला असून, प्राथमिक माहितीनुसार या प्रकरणात विशेष तपास पथकाने (SIT) कारवाईचा वेग वाढवला आहे. जळगाव येथील माध्यमिक शिक्षणाधिकारी कल्पना चव्हाण यांच्यासह एकूण ४८ अधिकाऱ्यांना नोटीस बजावण्यात आल्याची माहिती समोर येत आहे.
प्राथमिक माहितीनुसार, या घोटाळ्यात शासनाच्या निधीतील कोट्यवधी रुपयांचा अपहार झाल्याची शक्यता वर्तवली जात आहे. बनावट कागदपत्रांच्या आधारे शिक्षकांचे खोटे शालार्थ आयडी तयार करून त्याद्वारे वेतन काढण्यात आल्याचा संशय व्यक्त केला जात आहे.
दरम्यान, ऑक्टोबर २०२५ मध्ये नाशिक येथील आर्थिक गुन्हे शाखेने जळगाव जिल्ह्यातील काही शाळांची तपासणी करून महत्त्वाची कागदपत्रे जप्त केली होती. त्यानंतर या प्रकरणाचा तपास अधिक गतीने सुरू झाला.
प्राथमिक माहितीनुसार, १५ ते १८ एप्रिल दरम्यान नाशिक विभागीय कार्यालयात या प्रकरणाची सुनावणी होणार असून संबंधित अधिकाऱ्यांची चौकशी केली जाणार आहे. या चौकशीत बनावट आयडी मंजूर करण्यामागील प्रक्रिया आणि यामागील सूत्रधार कोण आहेत, याचा उलगडा होण्याची शक्यता आहे.
तसेच, प्राथमिक माहितीनुसार, राज्यभरात शेकडो बोगस शालार्थ आयडी तयार करण्यात आल्याची बाब समोर येत असून, नाशिक विभागातील शाळांमध्येही मोठ्या प्रमाणावर अनियमितता आढळल्याची चर्चा आहे.
या घडामोडींमुळे शिक्षण क्षेत्रात मोठी खळबळ उडाली असून पुढील कारवाईकडे सर्वांचे लक्ष लागले आहे. अधिकृत माहिती समोर आल्यानंतर या प्रकरणात आणखी मोठे खुलासे होण्याची शक्यता व्यक्त केली जात आहे.
