भांडे वाटप योजनेत गैरप्रकार; केवायसीसाठी पैसे उकळणारी महिला अटक
प्रतिनिधी | प्रणित काठोके
जळगाव जिल्ह्यात शासनाच्या घरगुती वस्तू वितरण योजनेत गंभीर अनियमितता उघडकीस आली आहे. केवायसी प्रक्रियेच्या नावाखाली लाभार्थ्यांकडून पैसे घेणाऱ्या एका महिलेला लाचलुचपत प्रतिबंधक पथकाने सापळा रचून पकडले.
माहितीनुसार, कामगार विभागांतर्गत राबविण्यात येणाऱ्या बांधकाम कामगार कल्याणकारी मंडळाच्या योजनेत लाभार्थ्यांना घरगुती साहित्याचे वाटप सुरू होते. या योजनेचा लाभ मिळवून देण्याच्या बहाण्याने आसमा परवीन शेख (वय ३८) हिने एका व्यक्तीकडून केवायसी पूर्ण करण्यासाठी १०० रुपयांची मागणी केली होती.
सदर व्यक्तीने याबाबत तक्रार केल्यानंतर लाचलुचपत प्रतिबंधक विभागाने प्राथमिक चौकशी करून सापळा लावला. नियोजनानुसार, संबंधित महिलेला प्रत्यक्ष पैसे स्वीकारताना अधिकाऱ्यांनी पकडले. या कारवाईत तिच्याकडून सुमारे ४७ हजारांहून अधिक रक्कम जप्त करण्यात आली असून, ती इतर लाभार्थ्यांकडूनही घेतली असावी असा संशय व्यक्त होत आहे.
या घटनेप्रकरणी जळगाव येथील एमआयडीसी पोलीस ठाण्यात भ्रष्टाचार प्रतिबंधक कायद्याअंतर्गत गुन्हा दाखल करण्याची प्रक्रिया सुरू आहे. तसेच, नागरिकांनी कोणत्याही शासकीय सेवेसाठी कोणी पैसे मागितल्यास त्वरित तक्रार करावी, असे आवाहन अधिकाऱ्यांनी केले आहे.
या कारवाईत संबंधित विभागातील वरिष्ठ अधिकाऱ्यांच्या मार्गदर्शनाखाली पथकाने सहभाग घेतला असून पुढील तपास सुरू आहे.
