चिखलीजवळ ट्रकचा भीषण अपघात; सुदैवाने जीवितहानी टळली
प्रतिनिधी | प्रणित काठोके
मुक्ताईनगर तालुक्यातील चिखली गावाजवळ आज सायंकाळच्या सुमारास एका ट्रकचा भीषण अपघात झाल्याची घटना घडली. प्राथमिक माहितीनुसार, ट्रकचे टायर अचानक फुटल्याने चालकाचे नियंत्रण सुटले आणि ट्रक रस्त्याच्या कडेला जाऊन आपटला.
या अपघातात सुदैवाने कोणतीही जीवितहानी झालेली नाही. मात्र, ट्रकचे मोठ्या प्रमाणात नुकसान झाले असून रस्त्यावर काही काळ तणावाचे वातावरण निर्माण झाले होते.
घटनेनंतर स्थानिक नागरिकांनी तात्काळ घटनास्थळी धाव घेत मदतकार्य सुरू केले. अपघातामुळे काही वेळ वाहतूक पूर्णपणे ठप्प झाली होती. सध्या पोलिस प्रशासनाच्या मदतीने त्या मार्गावर वनवे पद्धतीने वाहतूक सुरू करण्यात आली आहे.
या घटनेची माहिती मिळताच पोलिसांनी घटनास्थळी दाखल होऊन परिस्थिती नियंत्रणात आणली. अपघातग्रस्त ट्रक हटविण्याचे काम सुरू असून वाहतूक सुरळीत करण्याचे प्रयत्न सुरू आहेत.
दरम्यान, वाहनचालकांनी या मार्गावरून जाताना काळजीपूर्वक वाहन चालवावे, असे आवाहन प्रशासनाकडून करण्यात आले आहे.
