🔥 शिरूरमध्ये लग्नाच्या वादातून दोन गटांत तुफान राडा! दगडफेक, मिरची पूड अन् मारहाण; २८ ते २९ जणांवर गुन्हा दाखल!

प्रतिनिधी अशोक पाचुंदकर

शिरूर पोलीस स्टेशन, पुणे ग्रामीण

प्रेस नोट

शिरूर बसस्थानक परिसरात लग्नाच्या वादातून दोन गटांत तुफान हाणामारी; २७ ते ३० जणांविरुद्ध शिरूर पोलीस ठाण्यात गुन्हा दाखल

शिरूर : शिरूर शहरातील बसस्थानकाजवळील जयराज लॉजसमोर लग्नाच्या वादातून दोन गटांमध्ये जोरदार हाणामारी झाल्याची घटना दिनांक ३०/१०/२०२६ रोजी दुपारी घडली. याप्रकरणी शिरूर पोलीस स्टेशन येथे एकूण १९ नामनिर्देशित आरोपी व ९ ते १० अनोळखी इसमांविरुद्ध गुन्हा दाखल करण्यात आला आहे.

सदर घटना दिनांक ३०/१०/२०२६ रोजी दुपारी १५:२५ ते १५:३५ वाजण्याच्या दरम्यान शिरूर बसस्थानकाजवळील जयराज लॉजसमोरील मोकळ्या जागेत घडली. गावातील लग्नाच्या वादावरून दोन गटांमध्ये वाद निर्माण झाला. त्यानंतर दोन्ही गटांतील व्यक्तींनी एकमेकांना शिवीगाळ करून मोठमोठ्याने आरडाओरडा केला. तसेच झोंबाझोंबी, दगडफेक व मिरची पूड वापरून मारामारी केली. विशेष म्हणजे, संबंधित व्यक्तींना पोलीस कर्मचारी घटनास्थळी उपस्थित असल्याची माहिती असतानाही त्यांनी सार्वजनिक ठिकाणी हा प्रकार केला.

याप्रकरणी पोलीस अंमलदार सोनू मुरलीधर तावरे यांनी सरकारतर्फे फिर्याद दिली असून, शिरूर पोलीस स्टेशन येथे गुन्हा रजिस्टर नंबर ९९४/२०२६ अन्वये भारतीय न्याय संहिता कलम १९४(२), १२५(अ), ११८(१), ११५(२), ३५२, ३५१(२), ३५१(३) तसेच महाराष्ट्र पोलीस अधिनियम कलम ११०, ११२, ११७, ३७(१)(३) व १३५ प्रमाणे गुन्हा दाखल करण्यात आला आहे.

गुन्ह्यातील तपास : सदर गुन्ह्याचा तपास पोलीस उपनिरीक्षक भागवत हे करीत आहेत.

गुन्हा दाखल करणारे अंमलदार : पोलीस हवालदार गवळी, ब.नं. २२७१.

शिरूर पोलीस स्टेशन, पुणे ग्रामीण.