महिला आयोग आपल्या दारी : जनसुनावणीत ४४ तक्रारींवर जागेवरच तोडगा
राज्य महिला आयोगाचा न्यायाचा धडाका — आतापर्यंत ५ हजार प्रकरणे निकाली : अध्यक्षा रुपाली चाकणकर
श्री. मनोज उराडे अजिंक्य महाराष्ट्र न्युज जिल्हा प्रतिनिधी गडचिरोली, दि. २० :
महिलांना न्यायासाठी मुंबईपर्यंत चकरा माराव्या लागू नयेत, न्याय त्यांच्या दारातच मिळावा या उद्देशाने राबविण्यात येणाऱ्या *‘महिला आयोग आपल्या दारी’* उपक्रमाला गडचिरोलीत उत्स्फूर्त प्रतिसाद मिळाला. राज्य महिला आयोगाच्या अध्यक्षा रुपाली चाकणकर यांच्या अध्यक्षतेखाली झालेल्या जनसुनावणीत प्राप्त झालेल्या सर्व **४४ तक्रारींवर तत्काळ कार्यवाही करून अनेक प्रकरणांमध्ये जागेवरच तोडगा काढण्यात आला.**
महिलांच्या हक्कांसाठी राज्य महिला आयोग कटिबद्ध असून राज्यभरात जनसुनावणीच्या माध्यमातून **आतापर्यंत ५ हजार प्रकरणे निकाली काढण्यात आली**, अशी माहिती अध्यक्षा चाकणकर यांनी दिली.
अधिकारी एकत्र — महिलांना त्वरित न्याय
नियोजन भवन येथे पार पडलेल्या या जनसुनावणीत सदस्य सचिव नंदिनी आवडे, जिल्हा परिषद मुख्य कार्यकारी अधिकारी सुहास गाडे, अपर पोलीस अधीक्षक एम. रमेश, अतिरिक्त जिल्हाधिकारी संजय आसवले, जिल्हा विधी सेवा प्राधिकरणाचे सचिव अ.पू. खानोलकर, उपमुख्य कार्यकारी अधिकारी (महिला व बालकल्याण) दीपक बानाईत, नगराध्यक्षा प्रणोती निंभोरकर यांच्यासह विविध विभागांचे अधिकारी उपस्थित होते. तक्रारींचा जलद निपटारा व्हावा यासाठी चार स्वतंत्र पॅनल तयार करण्यात आले होते. प्रत्येक पॅनलमध्ये प्रशासन, पोलीस व कायदेविषयक तज्ज्ञ सहभागी असल्यामुळे अनेक प्रकरणांमध्ये महिलांना तात्काळ दिलासा मिळाला.
४४ तक्रारींवर कार्यवाही
जनसुनावणीत एकूण ४४ तक्रारींवर सुनावणी करण्यात आली. त्यामध्ये
* कौटुंबिक समस्या – २२
* सामाजिक समस्या – ५
* आर्थिक समस्या – ३
* इतर – १४
अशा तक्रारींचा समावेश होता.
“न्याय तुमच्या दारी आणण्यासाठी आम्ही जिल्ह्यात”
उद्घाटनपर भाषणात रुपाली चाकणकर म्हणाल्या,
महिलांना न्यायासाठी मुंबईत येण्याची गरज पडू नये म्हणून आयोग स्वतः जिल्ह्यात येत आहे. स्थानिक पातळीवरच प्रश्न निकाली काढणे हा या उपक्रमाचा उद्देश असून महिलांनी निर्भयपणे तक्रारी मांडाव्यात.
मदतीसाठी हेल्पलाईन
महिलांनी कोणत्याही अडचणीसाठी खालील सेवांचा वापर करावा –
* १०९१ महिला हेल्पलाईन
* ११२ आपत्कालीन सेवा
* वन स्टॉप सेंटर
* भरोसा सेल
* दामिनी पथक
तक्रारींवर तात्काळ कार्यवाही केली जाईल, असे त्यांनी स्पष्ट केले.
हुंडा व बालविवाहाविरोधात कडक इशारा
हुंडाबळी प्रतिबंधक कायदा अस्तित्वात असतानाही मुलींचा छळ होणे दुर्दैवी असल्याचे सांगत त्यांनी ठाम शब्दांत इशारा दिला —
**“हुंडा देणारा आणि घेणारा दोघेही गुन्हेगार आहेत. मुलींचे शिक्षण आणि कर्तृत्वावर आधारित विवाह व्हावेत.”**
बालविवाह रोखण्यासाठी पालकांनी सजग राहण्याचे आवाहन त्यांनी केले.
आदिवासी भागाबाबत सकारात्मक उल्लेख
आदिवासी भागात गर्भपाताचे प्रमाण अत्यल्प असल्याचे सांगत त्यांनी कौतुकाने नमूद केले —
**“गर्भ न मारणारे हेच खरे गर्भश्रीमंत समाज आहेत.”**
यावेळी विविध विभागांच्या अधिकाऱ्यांनी महिलांसाठी राबविण्यात येणाऱ्या योजनांची माहिती दिली. कार्यक्रमाचे प्रास्ताविक जिल्हा महिला व बालविकास अधिकारी ज्योती कडू यांनी केले.
