राष्ट्रीय पल्स पोलिओ मोहीम, नियमित लसीकरण तसेच जन्म-मृत्यू नोंदणी संदर्भात माननीय जिल्हाधिकारी यांच्या अध्यक्षतेखाली आढावा बैठक संपन्न
प्रतिनिधी निळकंठ वसु पाटील
राष्ट्रीय पल्स पोलिओ मोहीम, नियमित लसीकरण तसेच जन्म-मृत्यू नोंदणी या विषयांच्या अनुषंगाने जिल्हाधिकारी वर्षा मीना यांच्या अध्यक्षतेखाली आढावा सभा झाली.
दि. 28 जून 2026 रोजी आयोजित करण्यात येणाऱ्या राष्ट्रीय पल्स पोलिओ मोहिमेचा आढावा घेताना जिल्हाधिकारी यांनी मोहिमेचे सूक्ष्म नियोजन करण्याच्या सूचना दिल्या. राष्ट्रीय पल्स पोलिओ मोहिमेअंतर्गत पाच वर्षांखालील बालकांना पोलिओ प्रतिबंधक डोस देण्यात येणार आहे. याकरिता महानगरपालिका क्षेत्र वगळता ग्रामीण भागासाठी 87 हजार 174 तर शहरी भागासाठी 28 हजार 244 असे एकूण 1 लाख 15 हजार 438 बालकांचे उद्दिष्ट निश्चित करण्यात आले आहे.
मोहीम यशस्वी राबविण्यासाठी जिल्ह्यात तीन सदस्यीय 581 बूथ तसेच दोन सदस्यीय 602 बूथचे नियोजन करण्यात आले आहे. तसेच 72 ट्रान्झिट व 63 मोबाईल टीम कार्यरत राहणार आहेत. बूथवर न येणाऱ्या लाभार्थ्यांना घरोघरी भेट देऊन पोलिओ डोस देण्यासाठी 1 हजार 694 घरभेट पथके तयार करण्यात आली आहेत.
सभेमध्ये नियमित लसीकरण कार्यक्रमाचाही आढावा घेण्यात आला. नियमित लसिकरणामध्ये नियोजित लसीकरण सत्रे रद्द होणार नाहीत याची दक्षता घेण्याच्या सूचना जिल्हाधिकारी यांनी दिल्या. उन्हाळ्याच्या पार्श्वभूमीवर लसींची शीतसाखळी (Cold Chain) व्यवस्थित राखण्यात यावी तसेच एकही मूल लसीकरणापासून वंचित राहणार नाही यासाठी विशेष काळजी घेण्याचे निर्देश देण्यात आले.
जन्म-मृत्यू नोंदणी आढावा बैठकीत जिल्हाधिकारी म्हणाल्या की, जिल्ह्यातील जन्म, मृत्यू तसेच अर्भक मृत्यू घटनांची 100 टक्के नोंदणी होणे आवश्यक आहे. जन्म-मृत्यू नोंदणी ही शासनाच्या [CRS Portal](https://dc.crsorgi.gov.in?utm_source=chatgpt.com) या संकेतस्थळावरूनच करण्यात यावी. ज्या तालुक्यांमध्ये उशिरा जन्म-मृत्यू नोंदणीचे प्रमाण अधिक आहे, त्या ठिकाणी वेळेत नोंदणी होण्यासाठी जनजागृती व पाठपुरावा करण्याच्या सूचना देण्यात आल्या.
तसेच तालुका व गावपातळीवर जन्म-मृत्यू समन्वय समितीच्या सभा नियमित घेणे आवश्यक असल्याचे सांगण्यात आले. सुरक्षेच्या दृष्टीने CRS Portal चा User ID व Password हे केवळ जबाबदार व्यक्तीकडेच ठेवण्यात यावेत, ते कोणालाही शेअर करू नयेत तसेच त्याचा गैरवापर होऊन खोटी प्रमाणपत्रे वितरित होणार नाहीत याबाबत दक्षता घेण्याच्या सूचना जिल्हाधिकारी यांनी दिल्या.
सभेला जिल्हा आरोग्य अधिकारी डॉ. शशिकांत पवार, माता-बाल संगोपन अधिकारी डॉ. विनोद करंजेकर, सर्व तालुका आरोग्य अधिकारी, सर्व गटविकास अधिकारी, सांख्यिकी अधिकारी अंकिता गावंडे तसेच जिल्हा विस्तार व माध्यम अधिकारी बाळासाहेब घुगे उपस्थित होते.
