शिक्षकांचा आमदार शिक्षकच असावा; शिक्षकांच्या हक्कांचा आवाज विधान परिषदेत बुलंद करणार!- बाळासाहेब गोतारणे
प्रतिनिधी नवनाथ वाकडकर
महाराष्ट्र राज्य पुरोगामी शिक्षक फाउंडेशनच्या वतीने श्री. बाळासाहेब गोतारणे यांची भूमिका; शिक्षक, विद्यार्थी आणि शाळांच्या प्रश्नांसाठी निर्णायक लढ्याचा निर्धार!
पुणे (प्रतिनिधी) दिनांक 6 ऑक्टोबर 2026 : महाराष्ट्र राज्य पुरोगामी शिक्षक फाउंडेशनच्या वतीने पुणे विभाग शिक्षक मतदारसंघातून उमेदवारी करणारे श्री. बाळासाहेब गोतारणे यांनी शिक्षक, शिक्षकेतर कर्मचारी, विद्यार्थी आणि शाळांच्या विविध प्रश्नांवर विधान परिषदेत प्रभावीपणे आवाज उठविण्याचा निर्धार व्यक्त केला आहे. शिक्षण क्षेत्रातील प्रत्यक्ष अनुभव असलेला शिक्षकच शिक्षकांच्या अडचणी आणि विद्यार्थ्यांच्या गरजा अधिक संवेदनशीलतेने समजू शकतो. त्यामुळे “शिक्षकांचा आमदार शिक्षकच असावा” ही आपली ठाम भूमिका असल्याचे गोतारणे यांनी सांगितले.
“माझी उमेदवारी केवळ आमदार होण्यासाठी नाही. शिक्षक, विद्यार्थी आणि शिक्षण क्षेत्रातील प्रश्नांना योग्य व्यासपीठ मिळावे, ग्रामीण व मराठी माध्यमाच्या शाळांना बळकटी मिळावी आणि शिक्षण क्षेत्रात सकारात्मक बदल घडवून आणण्यासाठी प्रभावी आवाज निर्माण व्हावा, या व्यापक उद्देशाने मी निवडणुकीच्या मैदानात उतरलो आहे,” असे गोतारणे यांनी स्पष्ट केले.
शिक्षकांच्या प्रश्नांना सर्वोच्च प्राधान्य
जुनी पेन्शन योजना, अनुदान, वेतन व सेवा-सवलती, पदोन्नती, वरिष्ठता, संचमान्यता, रिक्त पदे, अतिरिक्त शिक्षकांचे प्रश्न, शिक्षकेतर कर्मचाऱ्यांच्या अडचणी तसेच शिक्षकांवरील वाढता गैरशैक्षणिक कामाचा भार या विषयांवर ठोस भूमिका घेण्याची गरज असल्याचे त्यांनी सांगितले.“शिक्षकांनी आपले आयुष्य विद्यार्थ्यांच्या भवितव्यासाठी समर्पित केले आहे. त्यामुळे त्यांच्या सेवा-सुरक्षिततेचा, सन्मानाचा आणि निवृत्तीनंतरच्या सुरक्षित भविष्याचा प्रश्न अत्यंत महत्त्वाचा आहे. शिक्षकांच्या न्याय्य मागण्यांसाठी महाराष्ट्र राज्य पुरोगामी शिक्षक फाउंडेशनच्या माध्यमातून संघटितपणे आणि लोकशाही मार्गाने सातत्याने पाठपुरावा केला जाईल,” अशी भूमिका गोतारणे यांनी मांडली.
ग्रामीण व मराठी माध्यमाच्या शाळा सक्षम झाल्या पाहिजेत
ग्रामीण भागातील शाळांमध्ये शिकणारे विद्यार्थी कोणत्याही बाबतीत शहरातील विद्यार्थ्यांपेक्षा कमी नाहीत. योग्य सुविधा, मार्गदर्शन आणि संधी मिळाल्यास ग्रामीण भागातील विद्यार्थीही विविध क्षेत्रांत उल्लेखनीय यश मिळवू शकतात.“गावातील शाळा ही त्या गावाच्या विकासाचे केंद्र असते. विद्यार्थी संख्या कमी झाली म्हणून शाळेचे सामाजिक महत्त्व कमी होत नाही. ग्रामीण आणि मराठी माध्यमाच्या शाळा टिकल्या, सक्षम झाल्या आणि गुणवत्तापूर्ण झाल्या पाहिजेत. त्यासाठी शासनाने विशेष लक्ष देणे आवश्यक आहे,” असे गोतारणे यांनी सांगितले.
विद्यार्थ्यांच्या सर्वांगीण विकासाला प्राधान्य
विद्यार्थ्यांचे शिक्षण केवळ परीक्षा आणि गुणांपुरते मर्यादित न राहता त्यांच्या व्यक्तिमत्त्वाचा सर्वांगीण विकास करणारे असावे. कला, क्रीडा, विज्ञान, तंत्रज्ञान, साहित्य, कौशल्य शिक्षण आणि मूल्यशिक्षण यांना शिक्षणात योग्य स्थान मिळाले पाहिजे.
ग्रामीण विद्यार्थ्यांना डिजिटल सुविधा, प्रयोगशाळा, ग्रंथालय, क्रीडा साहित्य आणि कला शिक्षणाच्या संधी उपलब्ध करून देणे ही काळाची गरज आहे. विद्यार्थ्यांमध्ये सर्जनशीलता, आत्मविश्वास, वैज्ञानिक दृष्टिकोन आणि सामाजिक बांधिलकी निर्माण करणारे शिक्षण देणे आवश्यक असल्याचे त्यांनी स्पष्ट केले.
शिक्षकांवर विश्वास आणि सन्मान आवश्यक
“शिक्षक हा समाज घडविणारा घटक आहे. शिक्षकांकडून गुणवत्तापूर्ण कामाची अपेक्षा करताना त्यांना आवश्यक साधने, प्रशिक्षण आणि विश्वासाचे वातावरणही दिले पाहिजे. शिक्षकांचा अध्यापनाचा वेळ अनावश्यक प्रशासकीय आणि गैरशैक्षणिक कामात खर्च होणार नाही, याची काळजी शासनाने घेतली पाहिजे,” असे गोतारणे म्हणाले.
शिक्षकांच्या सन्मानासाठी, त्यांच्या न्याय्य हक्कांसाठी आणि शिक्षण क्षेत्रातील सकारात्मक बदलांसाठी महाराष्ट्र राज्य पुरोगामी शिक्षक फाउंडेशन सातत्याने कार्यरत राहील, असेही त्यांनी स्पष्ट केले.
शिक्षण क्षेत्रातील प्रश्नांना व्यापक व्यासपीठ
शिक्षणव्यवस्था अधिक सक्षम करण्यासाठी शिक्षक, मुख्याध्यापक, शिक्षकेतर कर्मचारी, विद्यार्थी, पालक आणि समाज या सर्व घटकांचा सहभाग आवश्यक आहे. शिक्षण क्षेत्रातील निर्णय घेताना प्रत्यक्ष शाळेत काम करणाऱ्या शिक्षकांचे मत आणि अनुभव शासनाने गांभीर्याने विचारात घेतले पाहिजेत.“शिक्षणाच्या धोरणांमध्ये शिक्षकांचा सहभाग वाढला पाहिजे. शाळेतील वास्तव परिस्थिती समजून घेऊन निर्णय घेतले तरच ते प्रभावीपणे अंमलात येऊ शकतात,” असे गोतारणे यांनी नमूद केले.
फक्त प्रश्न मांडणार नाही; प्रश्न सुटेपर्यंत पाठपुरावा करणार
विधान परिषदेत प्रश्न उपस्थित करणे ही जबाबदारीची पहिली पायरी आहे. संबंधित विभागांशी संवाद साधणे, शासनाकडे सातत्याने पाठपुरावा करणे आणि आवश्यक तेथे लोकशाही मार्गाने संघर्ष करून प्रश्न मार्गी लावणे ही खरी लोकप्रतिनिधीची भूमिका असल्याचे त्यांनी सांगितले.पुणे विभागातील पुणे, सातारा, सांगली, सोलापूर आणि कोल्हापूर या पाचही जिल्ह्यांतील शिक्षकांशी सातत्याने संवाद साधून त्यांच्या स्थानिक तसेच विभागीय प्रश्नांना विधान परिषदेत आवाज देण्याचा आपला प्रयत्न राहील, असे गोतारणे यांनी स्पष्ट केले.
“माझा विजय म्हणजे शिक्षकांच्या प्रश्नांचा विजय”
“शिक्षकांनी माझ्यावर विश्वास ठेवून मला विधान परिषदेत पाठविले, तर तो माझा वैयक्तिक विजय नसेल. तो शिक्षकांच्या हक्कांचा, विद्यार्थ्यांच्या भविष्याचा, शाळांच्या सक्षमीकरणाचा आणि शिक्षणव्यवस्थेतील सकारात्मक बदलाचा विजय असेल.”
शिक्षकांचा सन्मान, विद्यार्थ्यांचे उज्ज्वल भविष्य आणि शाळांचे सक्षमीकरण या तीन प्रमुख मुद्द्यांना केंद्रस्थानी ठेवून महाराष्ट्र राज्य पुरोगामी शिक्षक फाउंडेशनच्या विचारधारेनुसार आपण काम करणार असल्याचे त्यांनी सांगितले.शिक्षकांचा आवाज विधान परिषदेत पोहोचविण्यासाठी साथ द्या अशी विनंती गोतारणे यांनी शिक्षकांना केली आहे.
PC CITY PRO
8208432041
