चोपडा ग्रामीण पोलिसांची मोठी कारवाई; तीन गावठी पिस्तुले, ८ जिवंत काडतुसे व दुचाकी जप्त
चोपडा : चोपडा ग्रामीण पोलिसांनी शस्त्रविरोधी कारवाई करत तीन संशयितांकडून तीन गावठी बनावटीची पिस्तुले, आठ जिवंत काडतुसे आणि एक दुचाकी असा मुद्देमाल जप्त केला आहे. या प्रकरणी तिघांना ताब्यात घेण्यात आले असून त्यांच्याविरुद्ध शस्त्र अधिनियम तसेच महाराष्ट्र पोलीस अधिनियमांतर्गत गुन्हा दाखल करण्यात आला आहे.
पोलिसांच्या नोंदीनुसार, लासूर गावाच्या पुढे नाटेवर-मंतीरा जवळील रस्त्यावर ही कारवाई करण्यात आली. संशयितांकडे काळ्या रंगाची गावठी बनावटीची पिस्तुले व जिवंत काडतुसे आढळून आली. सदर शस्त्रे विक्रीच्या उद्देशाने बाळगल्याचा पोलिसांचा आरोप आहे.
या कारवाईत साहिल दगडू आवारे (वय १९), सौरभ संतुराम मोतिरावे (वय २३) आणि रोहित चंद्रकांत जुजगार (वय ३०) यांना ताब्यात घेण्यात आले असल्याची नोंद आहे.
पोलिसांनी जप्त केलेल्या मुद्देमालामध्ये तीन गावठी पिस्तुलांची किंमत प्रत्येकी सुमारे २५ हजार रुपये, आठ जिवंत काडतुसांची किंमत सुमारे ८ हजार रुपये आणि हिरो स्प्लेंडर प्लस दुचाकीची किंमत सुमारे ४० हजार रुपये, असा एकूण अंदाजे १ लाख २३ हजार रुपयांचा मुद्देमाल असल्याचे कागदपत्रात नमूद आहे.
या प्रकरणी चोपडा ग्रामीण पोलीस ठाण्यात गुन्हा क्रमांक १९३/२०२६ नोंद असून शस्त्र अधिनियम १९५९ मधील कलम ३/२५ तसेच महाराष्ट्र पोलीस अधिनियमातील संबंधित कलमांनुसार कारवाई करण्यात आली आहे. तपास पोलीस अंमलदार संजय जयराम सोनवणे करीत असल्याची नोंद आहे.
दरम्यान, तिन्ही संशयितांकडे गावठी पिस्तुले व जिवंत काडतुसे नेमकी कुठून आली आणि त्यांचा पुढे कोणाला पुरवठा केला जाणार होता, याबाबत पोलिसांकडून तपास सुरू आहे.
