🛑परभणीत अवैध वाळू माफियांवर DIG शहाजी उमाप यांचा दणका! नदीपात्रातील वाळू उपशाचा पर्दाफाश; ८७ लाख ७५ हजारांचा मुद्देमाल जप्त!

प्रतिनिधी अनिल चव्हाण

परभणीत अवैध वाळू माफियांवर DIG शहाजी उमाप यांचा दणका!
इंजिन बोटीने नदीपात्रात वाळू उपशाचा पर्दाफाश; ३ टिप्पर, जेसीबीसह ८७ लाख ७५ हजारांचा मुद्देमाल जप्त!
परभणी | प्रतिनिधी
परभणी जिल्ह्यात अवैध वाळू उत्खनन आणि वाहतुकीविरुद्ध पोलीस उपमहानिरीक्षक शहाजी उमाप यांनी जोरदार कारवाईचा बडगा उगारला आहे. जिंतूर पोलीस ठाण्याच्या हद्दीतील मौजे निलज शिवारात सुरू असलेल्या अवैध वाळू उपशावर DIG यांच्या विशेष पथकाने धडक कारवाई करत तब्बल ८७ लाख ७५ हजार रुपयांचा मुद्देमाल जप्त केला आहे. या कारवाईमुळे अवैध वाळू व्यवसाय करणाऱ्यांमध्ये खळबळ उडाली आहे.
परभणी जिल्ह्यात अवैध रेती उत्खनन आणि वाहतुकीबाबत काही तक्रारी प्राप्त झाल्यानंतर पोलीस उपमहानिरीक्षक शहाजी उमाप यांनी संबंधित ठिकाणी कारवाई करण्यासाठी विशेष पथक रवाना केले होते.
त्यानुसार, सोमवार, दिनांक २ नोव्हेंबर २०२६ रोजी पथकाने जिंतूर पोलीस ठाण्याच्या हद्दीतील मौजे निलज शिवारातील वाळू धक्क्यावर छापा टाकला. यावेळी इंजिन बोटीच्या सहाय्याने नदीपात्रातून वाळू उपसा करून ती नदीकिनारी आणली जात असल्याचे निदर्शनास आले.
पोलिसांनी तत्काळ कारवाई करत घटनास्थळावरून ३ टिप्पर, १ जेसीबी, १ ट्रॅक्टर, चाळणी आणि नदीपात्रातून उपसा करून बाहेर काढून ठेवलेली १० ब्रास वाळू असा एकूण ८७ लाख ७५ हजार रुपयांचा मुद्देमाल जप्त केला.
या प्रकरणी जिंतूर पोलीस ठाण्यात गुन्हा दाखल करण्याची प्रक्रिया सुरू असून, अवैध वाळू उत्खनन आणि वाहतुकीविरुद्ध पोलिसांनी केलेल्या या कारवाईने वाळू माफियांचे धाबे दणाणले आहेत.
कारवाईत या पोलिसांचा सहभाग
या विशेष कारवाईत पोलीस उपनिरीक्षक पंकज इंगळे यांच्यासह पोलीस हेडकॉन्स्टेबल प्रदीप खानसोळे, गणेश राठोड, संदीप वाघाडे आणि गजानन डवरे यांनी सहभाग घेतला. पथकाच्या उल्लेखनीय कामगिरीबद्दल पोलीस उपमहानिरीक्षक शहाजी उमाप यांनी अधिकारी आणि अंमलदारांचे अभिनंदन केले.
अवैध धंद्यांची माहिती द्या; ‘खबर’ हेल्पलाइनवर संपर्क साधा!
आपल्या परिसरात सुरू असलेल्या अवैध व्यवसायांची माहिती थेट पोलिसांपर्यंत पोहोचवता यावी, यासाठी पोलीस उपमहानिरीक्षक कार्यालयाकडून ‘खबर’ हेल्पलाइन सुरू करण्यात आली आहे.
नागरिकांनी आपल्या भागातील अवैध व्यवसायांची माहिती ९१५०१००१०० या मोबाईल क्रमांकावर देण्याचे आवाहन नांदेड परिक्षेत्राचे पोलीस उपमहानिरीक्षक शहाजी उमाप यांनी केले आहे.
अवैध वाळू उत्खननाविरुद्धच्या या धडक कारवाईमुळे अवैध व्यवसायांवर पोलिसांची करडी नजर असल्याचा स्पष्ट संदेश दिला गेला आहे.