क्रीडा क्षेत्रातील उल्लेखनीय कार्य करणाऱ्या दिव्यांग खेळाडूंचा भाजपाकडून सत्कार
प्रतिनिधी सतीश कडू
आपल्या शारीरिक मर्यादांवर मात करून क्रीडा क्षेत्रात असामान्य कामगिरी करणाऱ्या दिव्यांग खेळाडूंनी केवळ स्वतःचेच नव्हे, तर संपूर्ण नागपूर शहराचे नाव उज्ज्वल केले आहे. अशा जिद्दी खेळाडूंचे समर्पण आणि संघर्ष यांना प्रोत्साहन देण्यासाठी, शहर भाजपा दिव्यांग विकास आघाडी, नागपूर महानगराच्या वतीने एका सत्कार समारंभाचे आयोजन करण्यात आले होते.
हा गौरव सोहळा यशस्वी प्रधानमंत्री श्री नरेंद्र मोदीजींच्या वाढदिवसानिमित्त सुरू झालेल्या ‘सेवा पंधरवड्याचा’ एक महत्त्वाचा भाग होता. या प्रेरणादायी कार्यक्रमाला मोठ्या संख्येने दिव्यांग खेळाडू आणि प्रतिष्ठित नागरिक उपस्थित होते.या सन्मान सोहळ्याचे अध्यक्षस्थान शहर भाजपाचे अध्यक्ष मा. श्री दयाशंकर तिवारी यांनी भूषवले. कार्यक्रमाचे प्रमुख अतिथी म्हणून छत्रपती पुरस्कार विजेते श्री विजयजी मुनेश्वर आणि दिव्यांग क्रिकेट संघाचे माजी कर्णधार श्री गुरुदास रावत उपस्थित होते, ज्यांनी खेळाडूंना प्रोत्साहन दिले. व्यासपीठावर प्रसिद्ध दिव्यांग उद्योगपती श्री जयसिंह चव्हाण, प्रदेशाध्यक्ष श्री धनंजय उपासनी, प्रदेश क्रीडा प्रभारी श्री श्रीकांत आगलावे महामंत्री,भाजपा नागपूर श्री रितेश गावंडे महामंत्री भाजपा नागपूर
सौ मनिषा धावडेयांची उपस्थिती होती.यावेळी, विविध खेळांमध्ये राष्ट्रीय आणि आंतरराष्ट्रीय स्तरावर उत्कृष्ट कामगिरी करणाऱ्या खेळाडूंचा गौरव करण्यात आला. यामध्ये तिरंदाजीतील (धनुर्विद्या) श्री अभिषेक डवरे आणि श्री संदीप नारायण गवई, आंतरराष्ट्रीय पॅरा पॉवर लिफ्टिंगमधील कु. प्रतिमा बोंडे आणि कु. रोशनी घोडे, तसेच क्रिकेटमधील राष्ट्रीय खेळाडू कु. लोकेश मरघडे यांचा समावेश होता.याव्यतिरिक्त, गोल्फबॉल (अंध) खेळाडू कु. निकिता डोंगरे, मुष्टियुद्ध (मुक्केबाजी) आणि जलतरणाचे (स्विमिंग) अभय नवले, व्हीलचेअर क्रिकेटचे गितेश बंसल, सिटिंग व्हॉलीबॉलचे मोहित बधिवे आणि अन्य अनेक प्रतिभावान खेळाडू जसे कु. नील राय (गतिमंद), कु. देवांशु पंडिया, वेदांत धुमाळे, प्रभात चौधरी आणि अक्षय चौधरी यांचा त्यांच्या उल्लेखनीय कामगिरीबद्दल सन्मान करण्यात आला.या आयोजनातून भाजपा दिव्यांग विकास आघाडीने हा संदेश दिला की, दिव्यांगजन हे समाजाचा अविभाज्य भाग आहेत आणि त्यांच्या आत्मविश्वासाला व प्रतिभेला सातत्याने पाठिंबा मिळाला पाहिजे. हा सोहळा यशस्वी करण्यासाठी सर्वश्री शेषराव बालू मांडवकर, राजकुमार कारगल, जनक साहू, तृप्ती लोणारे, नितीन माटे, रामू शेंडे आदींनी अथक परिश्रम घेतले. हा कार्यक्रम नागपूरच्या दिव्यांग खेळाडूंच्या शौर्याचे आणि प्रेरणेचे प्रतीक बनला.
