डोंबिवली रेल्वे स्थानकात ‘जीवन रक्षा अभियान’; रेल्वे अपघात रोखण्यासाठी जनजागृती
प्रतिनिधी विश्वनाथ शेनोय
डोंबिवली, ता. 17 जून 2026 : रेल्वे अपघाती मृत्यूंचे प्रमाण कमी करण्याच्या उद्देशाने डोंबिवली लोहमार्ग पोलीस ठाण्याच्या वतीने डोंबिवली रेल्वे स्थानक परिसरात ‘जीवन रक्षा अभियान’ अंतर्गत व्यापक जनजागृती उपक्रम राबविण्यात आला.
बुधवारी सकाळी 9 ते 11 या वेळेत फलाट क्रमांक 1 ते 5 तसेच पादचारी पुलावर वरिष्ठ पोलीस निरीक्षक बाबासाहेब थोरात यांच्या मार्गदर्शनाखाली पोलीस उपनिरीक्षक भिलारे, नष्टे, 25 पोलीस अंमलदार, 10 होमगार्ड, 3 एमएसएफ जवान, रेल्वे सुरक्षा बलाचे 2 जवान तसेच शौर्य अकॅडमीचे 18 विद्यार्थी सहभागी झाले होते.
या उपक्रमादरम्यान रॅली काढून, बॅनर-पोस्टरचे प्रदर्शन करून तसेच पत्रकांचे वाटप करण्यात आले. मेगाफोनद्वारे रेल्वे रूळ ओलांडू नका, धावत्या लोकलमध्ये चढ-उतार करू नका, इयरफोनचा वापर टाळा, सुरक्षित मार्गाचा अवलंब करा अशा विविध घोषणांद्वारे प्रवाशांना सुरक्षित रेल्वे प्रवासाचे महत्त्व पटवून देण्यात आले.
सदर जनजागृती कार्यक्रमाला सुमारे 300 ते 400 रेल्वे प्रवाशांची उपस्थिती होती. या उपक्रमामुळे प्रवाशांमध्ये रेल्वे सुरक्षेबाबत जागरूकता निर्माण झाली असून रेल्वे पोलिसांविषयी सकारात्मक भावना निर्माण झाल्याचे दिसून आले.
