गांधारी पुलावर वाहतूक नियमभंग करणाऱ्यांवर आरटीओची धडक कारवाई
प्रतिनिधी : विश्वनाथ शेनोय
कल्याण : उपप्रादेशिक परिवहन कार्यालय, कल्याणचे अधिकारी आशुतोष बारकुल यांच्या मार्गदर्शनाखाली वायुवेग पथकाने बुधवारी (दि. 27) रात्री गांधारी पुल परिसरात विशेष तपासणी मोहीम राबवून वाहतूक नियमांचे उल्लंघन करणाऱ्या वाहनचालकांवर कठोर कारवाई केली.
रात्री 9 ते 11 या वेळेत राबविण्यात आलेल्या या मोहिमेत मोटार वाहन निरीक्षक रोहन जाधव व प्रशांत सूर्यवंशी यांनी वाहनांची तपासणी केली. यावेळी बेदरकार (Rash) वाहन चालविणे, समोरून येणाऱ्या वाहनचालकांना त्रासदायक ठरणाऱ्या प्रखर (Dazzling) लाईट्सचा वापर करणे, वाहन परवाना (Driving Licence) नसताना वाहन चालविणे तसेच अल्पवयीनांकडून वाहन चालविणे (Underage Driving) अशा गंभीर नियमभंगाच्या प्रकरणांवर विशेष लक्ष केंद्रित करण्यात आले.
तपासणीदरम्यान नियमांचे उल्लंघन करणाऱ्या वाहनचालकांविरोधात मोटार वाहन कायद्यानुसार दंडात्मक कारवाई करण्यात आली. वाहतूक शिस्त राखणे, अपघातांचे प्रमाण कमी करणे आणि नागरिकांच्या सुरक्षिततेच्या दृष्टीने अशा विशेष मोहिमा पुढेही नियमितपणे सुरू राहणार असल्याची माहिती परिवहन विभागाकडून देण्यात आली.
परिवहन विभागाने वाहनचालकांना वाहतूक नियमांचे काटेकोर पालन करण्याचे, वैध परवाना व आवश्यक कागदपत्रे बाळगण्याचे तसेच सुरक्षित वाहनचालना करण्याचे आवाहन केले आहे.
