१६ गावांचा आरोग्यभार; अडपल्ली (माल) प्राथमिक आरोग्य केंद्रात मनुष्यबळाची कमतरता
फार्मासिस्ट, लॅब टेक्निशियनसह ७ पदे रिक्त; मलेरिया, डेंग्यू, टायफॉईड तपासण्यांचा प्रश्न — ग्रामस्थांचे सीईओंकडे निवेदन
प्रतींनिधी श्री मनोज उराडे : दुर्गम ग्रामीण भागातील १६ गावांतील नागरिकांसाठी महत्त्वाचे आरोग्य केंद्र असलेल्या अडपल्ली (माल) प्राथमिक आरोग्य केंद्रातील विविध पदे रिक्त असल्याने आरोग्यसेवेबाबत ग्रामस्थांनी चिंता व्यक्त केली आहे. फार्मासिस्ट, लॅब टेक्निशियन, २ एमपीडब्ल्यू आणि ३ चपराशी अशी एकूण ७ पदे रिक्त असल्याचे ग्रामस्थांनी जिल्हा परिषदेच्या मुख्य कार्यकारी अधिकाऱ्यांना दिलेल्या निवेदनात नमूद केले आहे.फार्मासिस्टचे पद रिक्त असल्याने रुग्णांना औषधे देण्यासाठी आवश्यक पात्र मनुष्यबळाची व्यवस्था कशी केली जाते? तसेच औषध वितरणाची जबाबदारी कोणाची आणि त्यासाठी अधिकृत देखरेख कशी केली जाते, असा प्रश्न ग्रामस्थांनी उपस्थित केला आहे. रुग्णांच्या औषधोपचाराशी संबंधित कोणतीही प्रतिकूल परिस्थिती उद्भवल्यास जबाबदारी निश्चित करण्यासाठी स्पष्ट व्यवस्था असणे आवश्यक असल्याचेही ग्रामस्थांचे म्हणणे आहे.
लॅब टेक्निशियनचे पद रिक्त असल्याने मलेरिया, डेंग्यू, टायफॉईडसह आवश्यक प्रयोगशाळा तपासण्या नियमितपणे कशा होणार, असा सवाल ग्रामस्थांनी केला आहे. तपासणीची सुविधा उपलब्ध न झाल्यास दुर्गम भागातील रुग्णांना इतर आरोग्य केंद्रांकडे जावे लागू शकते. यामुळे विशेषतः आर्थिकदृष्ट्या सामान्य कुटुंबातील नागरिकांना प्रवास, वेळ आणि उपचाराचा अतिरिक्त भार सहन करावा लागू शकतो, अशी चिंता व्यक्त करण्यात आली आहे. आजारी व्यक्तीला उपचारासाठी दूर जावे लागू नये, वेळेवर तपासणी व्हावी आणि आवश्यक औषधोपचार मिळावा, ही ग्रामीण नागरिकांची मूलभूत अपेक्षा असल्याचे ग्रामस्थांनी म्हटले आहे.
या आरोग्य केंद्रावर १६ गावांतील नागरिकांचा आरोग्यसेवेचा भार लक्षात घेता एमबीबीएस डॉक्टरची उपलब्धता तातडीने सुनिश्चित करावी, अशी मागणीही निवेदनातून करण्यात आली आहे. फार्मासिस्ट, लॅब टेक्निशियन आणि इतर पदे रिक्त असताना उपलब्ध कर्मचाऱ्यांवर अतिरिक्त कामाचा ताण येण्याची शक्यता असल्याने आवश्यक मनुष्यबळ उपलब्ध करून देण्याची मागणी करण्यात आली आहे. ग्रामस्थांनी फार्मासिस्ट व लॅब टेक्निशियनची पदे भरणे, आवश्यक एमपीडब्ल्यू व चपराशी उपलब्ध करणे, एमबीबीएस डॉक्टरची व्यवस्था करणे तसेच औषध वितरण व प्रयोगशाळा तपासण्यांची नियमबद्ध व्यवस्था सुनिश्चित करण्याची मागणी केली आहे.तसेच रिक्त पदांबाबत प्रशासनाने केलेल्या कार्यवाहीची लेखी माहिती देण्यात यावी, अशी मागणी करण्यात आली आहे. निवेदन प्राप्त झाल्यापासून ७ दिवसांत ठोस कार्यवाही करण्याची मागणी ग्रामस्थांनी केली असून, पुढील कार्यवाहीकडे १६ गावांतील नागरिकांचे लक्ष लागले आहे.
