अडावदच्या नूतन इंग्लिश मीडियम स्कूलमध्ये शिक्षक दिनाचा जल्लोष!
विद्यार्थी बनले ‘शिक्षक’; हर्षिका पाटीलने सांभाळली एक दिवसाची प्राचार्यपदाची धुरा
उत्तर महाराष्ट्र विभागीय संपादक : समाधान पाटील
अडावद, ता. चोपडा : भारताचे माजी राष्ट्रपती व महान शिक्षणतज्ज्ञ डॉ. सर्वपल्ली राधाकृष्णन यांच्या जयंतीनिमित्त साजरा होणारा शिक्षक दिन अडावद येथील नूतन प्रायमरी इंग्लिश मीडियम स्कूलमध्ये उत्साहपूर्ण आणि आनंदी वातावरणात साजरा करण्यात आला. शिक्षकांप्रती आदर व्यक्त करण्यासोबतच विद्यार्थ्यांना शिक्षकाची भूमिका अनुभवण्याची संधी या उपक्रमातून मिळाली.
कार्यक्रमाच्या प्रारंभी नूतन ज्ञान मंदिर माध्यमिक व उच्च माध्यमिक विद्यालयाचे माजी प्राचार्य पी. डी. चौधरी सर आणि नूतन प्रायमरी इंग्लिश स्कूलच्या प्राचार्या सेंड्रा मॅडम यांच्या हस्ते डॉ. सर्वपल्ली राधाकृष्णन यांच्या प्रतिमेचे पूजन करण्यात आले.
या कार्यक्रमाचे विशेष आकर्षण ठरले ते इयत्ता तिसरीतील विद्यार्थिनी कु. हर्षिका ज्ञानेश्वर पाटील हिचे. हर्षिकाने एक दिवसासाठी प्राचार्यपदाची जबाबदारी स्वीकारत शाळेच्या कामकाजाचा अनुभव घेतला. तिच्या या भूमिकेचे उपस्थितांनी कौतुक केले.
विद्यार्थी बनले ‘शिक्षक’!
शिक्षक दिनाचे औचित्य साधून शाळेतील निवडक विद्यार्थी-विद्यार्थिनींनी शिक्षकांची भूमिका उत्साहाने पार पाडली. विद्यार्थी शिक्षकांसह शाळेतील सर्व शिक्षकांचा पी. डी. चौधरी सर, सेंड्रा मॅडम आणि उपप्राचार्य प्रकाश राणे सर यांच्या हस्ते गुलाबपुष्प देऊन सत्कार करण्यात आला.
यावेळी विद्यार्थ्यांनी भाषणातून डॉ. सर्वपल्ली राधाकृष्णन यांच्या कार्याचा गौरव करत गुरुजनांविषयीच्या आदरभावना व्यक्त केल्या.
पी. डी. चौधरी सर यांनी डॉ. राधाकृष्णन यांच्या जीवनकार्यावर प्रकाश टाकत विद्यार्थ्यांना मन लावून अभ्यास करण्याचे आवाहन केले. तसेच विद्यार्थ्यांकडून नियमित अभ्यास करण्याचा संकल्प करून घेण्यात आला.
आरती महाले मॅडम यांनी गुरुचे महत्त्व विशद करत पौराणिक काळापासून चालत आलेल्या गुरु-शिष्य परंपरेची माहिती विद्यार्थ्यांना दिली.
शिक्षकांचा भेटवस्तू देऊन सन्मान
शिक्षक दिनाच्या निमित्ताने शाळेचे चेअरमन डॉ. केदारजी थेपडे आणि सेक्रेटरी सौ. सुषमाताई थेपडे यांच्या वतीने शाळेतील सर्व शिक्षक बंधू-भगिनींना भेटवस्तू देऊन सन्मानित करण्यात आले.
कार्यक्रमास ईश्वरदास पिंगळे, रॉबर्ट सर, सुषमा सवनेर, शबनम शेख, आरती महाले, रुपाली पाटील, अंजना साळुंखे, ज्योती बीसनारिया, जयश्री पाटील, भावना कुंभार, अनुजा कचरे, कल्याणी राजपूत, ऐश्वर्या पिंगळे तसेच विद्यार्थी शिक्षक उपस्थित होते.
कार्यक्रमाचे प्रास्ताविक सेंड्रा मॅडम यांनी केले. सूत्रसंचालन ईश्वरदास पिंगळे यांनी केले, तर आभार प्रदर्शन प्रकाश राणे सर यांनी मानले.
विद्यार्थ्यांना शिक्षकाची जबाबदारी प्रत्यक्ष अनुभवता यावी, तसेच गुरुजनांविषयी आदर आणि शिक्षणाचे महत्त्व त्यांच्या मनात रुजावे, या उद्देशाने आयोजित करण्यात आलेल्या या उपक्रमामुळे संपूर्ण शाळेचे वातावरण ज्ञान, संस्कार आणि उत्साहाने भारावून गेले.
