एलईडी लावलेली मासेमारी
नौका साहित्यासह जप्त
प्रतिनिधी मुकुंद मोरे
रत्नागिरी :- मत्स्यव्यवसाय विभागाच्या गस्ती नौकेने मिऱ्या-काळबादेवी समुद्रासमोर एलईडी लाईट असलेल्या मासेमारी नौकेवर कारवाई केली. ही कारवाई शनिवारी (४ एप्रिल) मध्यरात्री २:१५ वाजण्याच्या दरम्यान करण्यात आली असून, नौका मत्स्य विभागाच्या अधिकाऱ्यांनी ताब्यात घेतली आहे.
मिरकरवाडा ते गणपतीपुळे दरम्यान मत्स्यव्यवसाय विभागाच्या अंमलबजावणी अधिकारी स्मितल कांबळे या नियमित गस्त घालत असतात. शनिवारी मध्यरात्री भगवतीबंदर-राजवाडी येथील कैलास उल्हास कुबल यांच्या मालकीची ‘भराडी प्रसन्न’ (आयएनडी-एमएच-०४-एमएम-३७२३) ही मासेमारी नौका महाराष्ट्राच्या सागरी जलधी क्षेत्रात
मिऱ्या-काळबादेवी समुद्रासमोर अनधिकृतपणे एलईडी लाईटद्वारे मासेमारी करण्याच्या हेतूने नांगरून ठेवण्यात आलेली दिसली. ही नौका पथकाने तात्काळ जप्त करुन ताब्यात घेतली.
या नौकेवर तांडेलसह ५ खलाशी होते. या नौकेवर आढळलेले एलईडी लाईट व जनरेटर नौकेसह पुढील कार्यवाहीपर्यंत मिरकरवाडा बंदरात जप्त करून ठेवण्यात आले आहे. याप्रकरणी महाराष्ट्र सागरी मासेमारी नियमन अधिनियम (सुधारणा) अध्यादेश, २०२१ अन्वये कारवाई करण्यात येणार आहे. अंमलबजावणी अधिकारी तथा परवाना अधिकारी स्मितल कांबळे तसेच सुरक्षा रक्षक सुजन पोवार, अमोल पिलणकर, अनिकेत पवार आणि भूषण करमरकर यांनी ही कारवाई केली आहे.
