डीजेच्या नादात तरुणांनो भविष्य बिघडवू नका! सोलापूर पोलीस आयुक्तांचा थेट इशारा
प्रतिनिधी रणजीत मस्के
पोलिसांच्या रेकॉर्डवर आल्यास नोकरी पासपोर्टला मुकाल सोलापूर शहरात आगामी काळात साजऱ्या होणाऱ्या उत्सवाच्या पार्श्वभूमीवर कायदा व सुव्यवस्था राखण्यासाठी प्रशासनाने अत्यंत कडक पावले उचलली आहेत. सार्वजनिक ठिकाणी कायद्याचे उल्लंघन केल्यास संबंधितांवर कोणतीही हयगय न करता तत्काळ गुन्हे दाखल केले जातील. एकदा का गुन्हा दाखल झाला की तरुणांचे संपूर्ण भविष्य उद्ध्वस्त होऊ शकते असा अत्यंत स्पष्ट आणि थेट इशारा पोलीस आयुक्त एम राज कुमार यांनी दिला आहे.
उत्सवाच्या काळात शांतता राखण्यासाठी पोलीस यंत्रणा सज्ज असून, शहरात कोणालाही कोणत्याही परिस्थितीत डीजे लावण्याची परवानगी अजिबात दिली जाणार नाही, असे प्रशासनाकडून ठणकावून सांगण्यात आले आहे.शहरातील तरुणाईने कोणत्याही बेकायदेशीर कृत्यात सहभागी होऊन स्वतःचे नुकसान करून घेऊ नये यासाठी पोलिसांकडून सातत्याने जाणीवजागृती केली जात आहे पोलीस आयुक्तांनी दिलेल्या सविस्तर माहितीनुसार जर एखाद्या तरुणावर कायद्याचा भंग केल्याप्रकरणी एकदाही गुन्हा दाखल झाला तर त्याची कायमस्वरूपी नोंद थेट पोलिसांच्या रेकॉर्डवर होते. अशी गुन्हेगारी पार्श्वभूमी तयार झाल्यानंतर संबंधित तरुणाला भविष्यात कोणत्याही ठिकाणी चांगली नोकरी मिळणे जवळपास अशक्य होते. एवढेच नाही तर, उच्च शिक्षणासाठी किंवा रोजगारासाठी परदेशात जायचे असल्यास अत्यंत आवश्यक असणारा पासपोर्ट मिळण्यातही मोठी अडचण निर्माण होते. त्यामुळे क्षणिक आनंदाच्या आहारी जाऊन स्वतःच्या उज्वल भविष्याशी खेळू नये असे आवाहन करण्यात आले आहे.
सध्या शहरामध्ये भारतरत्न डॉ. बाबासाहेब आंबेडकर जयंती उत्सव सोहळ्याच्या निमित्ताने जोरदार तयारी सुरू आहे. मात्र, यंदा या सोहळ्याच्या भव्य मिरवणुकीच्या तारखांबाबत दोन वेगवेगळे निर्णय समोर आले आहेत. माजी नगरसेवक आनंद चंदनशिवे यांनी दिलेल्या माहितीनुसार, ते आपली उत्सव मिरवणूक रविवारी (ता. १९) काढणार असल्याचे त्यांनी जाहीर केले आहे. तर दुसरीकडे, मध्यवर्ती मंडळाचे विश्वस्त राजाभाऊ सरवदे यांनी त्यांची मिरवणूक मंगळवारी (ता. २१) काढण्याचा निर्णय घेतला आहे. दोन वेगवेगळ्या दिवशी मिरवणुकांचे आयोजन करण्यात आल्यामुळे सोलापूर पोलिसांना आता एकाच उत्सवासाठी दोनदा विशेष बंदोबस्ताची ड्युटी पार पाडावी लागणार आहे. संपूर्ण शहरात कायदा व सुव्यवस्था अबाधित ठेवण्यासाठी पोलिसांवर हा अतिरिक्त ताण पडणार आहे
