अजिंक्य महाराष्ट्र न्यूज एका सामान्य माणसाची अनोखी सुरुवात
देऊळगांव राजा पोलीस ठाणेच्या हद्दीत अवैध धंद्यांचा वाढता उच्छाद, ठाणेदार संतोष महाल्ले अडचणीत, सातारच्या पुरीगोसावी यांनी ठाणेदार संतोष महाल्लेचे घेतले वृत्त हाती,
संभाजी पुरीगोसावी प्रतिनिधी.( बुलढाणा जिल्हा)
बुलढाणा जिल्ह्यातील देऊळगांव राजा पोलीस ठाणेच्या हद्दीत अवैध धंद्यांचे जाळे अधिकच विस्तारत असून, ठाणेदार संतोष महाल्ले यांच्या कार्यप्रणालीवर गंभीर आरोप करण्यात आले आहेत. अवैध वाहतूक, वडाप व्यवसाय, आणि इतर बेकायदेशीर धंद्यांवर कारवाई करण्याऐवजी हप्ता घेण्याचा आरोप ठाणेदारांवर करण्यात आला आहे.
पोलीस ठाण्यातील हलगर्जीपणा
देऊळगाव राजा पोलीस ठाण्याच्या हद्दीत अवैध धंदे वाढत असल्याने नागरिकांमध्ये असंतोष निर्माण झाला आहे. विशेषतः वडाप वाहतूकदारांवर ठाणेदारांचे लक्ष असल्याचे समोर आले आहे. परंतु, या लक्षाचा उद्देश कायदेशीर कारवाई नसून हप्तेखोरी असल्याचा आरोप आहे. “अवैध धंदे चालवा, पण वेळेत हप्ता द्या,” असा स्पष्ट संदेश देण्यात येत असल्याचे बोलले जात आहे.
*पत्रकाराला मारहाणीची घटना ठाणेदारांच्या अज्ञानात*
याच हद्दीत एका पत्रकाराला मारहाण झाल्याची गंभीर घटना घडली. मात्र, या घटनेबद्दल ठाणेदारांना अद्याप माहिती नसल्याचा दावा त्यांनी केला आहे. “ठाणेदाराला त्यांच्या हद्दीत घडणाऱ्या घटनांची माहितीच नाही, यापेक्षा मोठी विडंबना कोणती?” अशी टीका नागरिकांनी केली आहे.
*वरिष्ठ पोलीस अधिकाऱ्यांकडे तक्रारींचा पाऊस*
या परिस्थितीत, स्थानिक नागरिक आणि पत्रकार संघटना चांगल्याच संतप्त झाल्या असून, त्यांनी थेट वरिष्ठ पोलीस अधिकाऱ्यांकडे तक्रारी नोंदवल्या आहेत. पोलीस महासंचालक, विशेष पोलीस महानिरीक्षक, जिल्हा पोलीस अधीक्षक, तसेच उपविभागीय पोलीस अधिकारी यांच्याशी संपर्क साधण्यात आला आहे. “अवैध धंद्यांवर कारवाई करण्याऐवजी त्यांना अप्रत्यक्ष समर्थन देणे, ही पोलिसांच्या प्रतिमेला काळिमा फासणारी गोष्ट आहे,” असे मत व्यक्त करण्यात येत आहे.
ठाणेदार संतोष महाल्ले यांच्यावर आता चौफेर दबाव वाढला आहे. त्यांच्या कार्यशैलीवर वरिष्ठ अधिकाऱ्यांकडून चौकशीची मागणी होत आहे. “अवैध धंद्यांवर कारवाई करण्याऐवजी हप्ता वसूल करण्याचा आरोप गंभीर असून, यामुळे पोलीस दलाचा विश्वास डळमळीत होतो,” असे स्थानिक सामाजिक कार्यकर्त्यांनी सांगितले.
*आता पुढे काय?*
वरिष्ठ पोलीस अधिकारी या प्रकरणाची गंभीर दखल घेत चौकशीसाठी विशेष पथक नेमणार असल्याची शक्यता आहे. जर आरोप सिद्ध झाले, तर ठाणेदारांवर कठोर कारवाई होईल. या घटनेने पुन्हा एकदा पोलीस यंत्रणेमधील भ्रष्टाचार आणि दुर्लक्षाचे प्रश्न ऐरणीवर आले आहेत.
गावकरी आणि सामाजिक संघटनांनी देऊळगाव राजा पोलीस ठाण्याच्या कार्यपद्धतीत बदल करण्याची मागणी केली आहे. “अवैध धंद्यांवर कठोर कारवाई होऊन सामान्य जनतेला न्याय मिळावा,” अशी अपेक्षा व्यक्त करण्यात येत आहे.
