साबळेवाडी येथे वृद्ध महिलेच्या गळ्यातील सोन्याचे मंगळसूत्र चोरी
प्रतिनिधी अशोक पाचुंदकर
शिरूर तालुक्यातील साबळेवाडी (टाकळी हाजी) येथे अज्ञात चोरट्याने वृद्ध महिलेच्या गळ्यातील सोन्याचे मंगळसूत्र हिसकावून नेल्याची घटना घडली आहे. याप्रकरणी शिरूर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे.
मिळालेल्या माहितीनुसार, साबळेवाडी येथील श्रीमती शालू भीवराज कदम (वय ७० वर्षे, रा. साबळेवाडी, टाकळी हाजी, ता. शिरूर) या घराजवळ असताना एक अनोळखी इसम त्यांच्या जवळ आला. बोलण्याच्या बहाण्याने जवळ येत त्याने त्यांच्या गळ्यातील अंदाजे १५ ग्रॅम वजनाचे सोन्याचे मंगळसूत्र तोडून घेतले व दुचाकीवरून पसार झाला. चोरी गेलेल्या दागिन्याची किंमत अंदाजे ८० हजार रुपये आहे.
या घटनेचा तपास पोलीस उपनिरीक्षक श्री. खटीक हे करत आहेत. अज्ञात आरोपीचा शोध घेण्यासाठी शिरूर पोलीस ठाण्याचे पथक तपास करत आहे.
