विरावली–दहिगाव रस्त्यावर तरुणाची हत्या; दोन संशयित आरोपी पोलीस ठाण्यात हजर
यावल प्रतिनिधी( रविंद्र आढाळे)
यावल तालुक्यातील विरावली-दहिगाव रस्त्यावर एका तरुणाची निर्दयपणे हत्या करण्यात आली असून या घटनेने जिल्ह्यात खळबळ उडाली आहे. विशेष म्हणजे, खून झाल्यानंतर अवघ्या काही तासांतच दोन संशयित आरोपी स्वतः मोटारसायकलवरून पोलीस ठाण्यात दाखल झाले आणि गुन्ह्याची कबुली दिली
मृत तरुणाची ओळख इम्रान युनूस पटेल (वय २१, मूळ रहिवासी हनुमंतखेडा, ता.धरणगाव) अशी झाली आहे. तो सध्या दहिगाव येथे आपल्या मामाकडे राहत होता. गुरुवारी रात्री गावाजवळ विरावली-दहिगाव मार्गावर त्याच्यावर जीवघेणा हल्ला झाला आणि त्यात त्याचा मृत्यू झाला.
या प्रकरणी ज्ञानेश्वर गजानन पाटील (वय १९) आणि गजानन रवींद्र कोळी (वय १९) या दोन तरुणांनी स्वतः यावल पोलीस ठाण्यात हजर होत गुन्ह्याची जबाबदारी स्वीकारली. पोलिसांनी तत्काळ त्यांना ताब्यात घेऊन तपास सुरू केला आहे.
जळगाव जिल्ह्यात गेल्या काही दिवसांपासून खूनाच्या घटना वाढल्याने कायदा-सुव्यवस्थेवर प्रश्नचिन्ह उपस्थित केले जात आहे. नुकतेच जामनेर तालुक्यातील खुनानंतर पुन्हा एका जीवघेण्या घटनेने नागरिकांत भीतीचे वातावरण निर्माण झाले आहे.
सध्या यावल पोलीस तपास करत असून या खुनामागील कारण शोधण्याचे प्रयत्न सुरू आहेत.
