अजिंक्य महाराष्ट्र न्यूज एका सामान्य माणसाची अनोखी सुरूवात
कामगारांच्या कपातीच्या भविष्य निर्वाह निधी रकमेबाबत तातडीने कारवाई करण्याबाबत मागणी
जळगाव हमीद तडवी
जळगाव एमआयडीसी परिसरातील अनेक खाजगी कंपन्यांमध्ये कार्यरत असलेल्या कामगारांच्या पगारातून दरमहा नियमितपणे भविष्य निर्वाह निधी (प्रायव्हेट फंड) म्हणून रक्कम कपात केली जाते. मात्र, दुर्दैवाने ही कपात केलेली रक्कम संबंधित कंपन्यांकडून भविष्य निर्वाह निधी कार्यालयाकडे जमा केली जात नसल्याच्या तक्रारी महाराष्ट्र नवनिर्माण सेनेकडे मोठ्या प्रमाणावर येत आहेत.
कामगारांच्या कष्टाने मिळवलेल्या पगारातील रक्कम कपात करूनही संबंधित निधी कार्यालयात जमा केला गेला नाही, ही बाब गंभीर असून कामगारांवर अन्याय करणारी आहे. भविष्य निर्वाह निधी हा कामगारांच्या भविष्याची सुरक्षितता, निवृत्ती नंतरचा आधार व आपत्कालीन परिस्थितीतील हक्काचा बचाव आहे. त्या निधीची चोरी अथवा अडवणूक करणे हे कामगारांच्या जीवनाशी खेळ करण्यासारखे आहे.
महाराष्ट्र नवनिर्माण सेनेतर्फे आपणास या पत्राद्वारे कठोरपणे सुचित करण्यात येत आहे की –
१. आपल्या कार्यक्षेत्रातील अशा सर्व खाजगी कंपन्यांची तपासणी करून, ज्यांनी कामगारांची कपात केलेली भविष्य निर्वाह निधी रक्कम अद्याप जमा केलेली नाही, त्यांच्यावर तातडीने कठोर कारवाई करावी.
२. संबंधित कंपन्यांना सदर रक्कम तातडीने भविष्य निर्वाह निधी खात्यात जमा करण्याचे आदेश देण्यात यावेत.
३. तसेच, भविष्यात कोणतीही कंपनी कामगारांच्या भविष्य निर्वाह निधी रक्कम थकवणार नाही, याची कठोर अंमलबजावणी करावी.
अन्यथा, महाराष्ट्र नवनिर्माण सेना ही कामगारांच्या न्यायासाठी रस्त्यावर उतरून आपले हक्क बजावेल. आपल्या कार्यालयाच्या निष्क्रियतेविरोधात तीव्र आंदोलन उभारले जाईल, याची नोंद घ्यावी.
कामगारांच्या घामाचा प्रत्येक थेंब हा त्यांचा हक्क आहे आणि त्या हक्कासाठी
लढणे ही महाराष्ट्र नवनिर्माण सेनेची बांधिलकी आहे
याप्रसंगी महानगराध्यक्ष विनोद शिंदे उप महानगराध्यक्ष श्रीकृष्ण मेंगडे ललित शर्मा राजेंद्र निकम रज्जाक सय्यद अविनाश पाटील दीपक राठोड साजन पाटील जितेंद्र पाटील भूषण ठाकरे विकास ऐश्वर्या श्रीराम विकास पात्रे महिला शाखाध्यक्ष अनिता कापुरे लक्ष्मी मोरे उपस्थित होते
